अनिल देशमुखांच्या घरावर ‘ईडी’चे छापे…
अनिल देशमुखांना अटक होणार?
लोकवार्ता । प्रतिनिधी
सक्तवसुली संचालनायलयाने (ईडी) आज सकाळी राज्याचे माजी गृहमंत्री अनिल देशमुख यांच्या नागपुरमधील निवासस्थानी छापा टाकला. तसेच, ईडीने देशमुख यांच्या जीपीओ चौकातील निवासस्थानासह त्यांच्या निकटवर्तीयांकडे देखील छापे टाकल्याचे समोर आले आहे. त्यामुळे अनिल देशमुख यांच्या अडचणीत वाढ होण्याची दाट शक्यता आहे.
अनिल देशमुख यांच्या घरी ईडीकडून झडाझडती सुरू आहे. या तपासासाठी ६ ते ७ अधिकारी नागपुरातील देशमुखांच्या घरी पोहोचले आहेत. अनिल देशमुख यांच्या घराबाहेर बंदोबस्तासाठी सीआरपीएफचे जवान तैनात करण्यात आले आहेत.
१०० कोटी रुपयांच्या खंडणी प्रकरणी पोलीस अधिकारी परमबीर सिंग यांच्या आरोपावरून अनिल देशमुख यांच्यावर ईडीनं गुन्हा दाखल केला होता. २५ मे रोजी अनिल देशमुखांशी संबंधित नागपुरातील तिघांकडे ईडीने चौकशी केली होती.
१०० कोटी रुपयांच्या खंडणी प्रकरणी आता अनिल देशमुखांवर झालेल्या आरोपानंतर ईडीच्या या छापेमारीमुळे त्यांच्या अडचणी वाढण्याची शक्यता आहे.