सकारात्मक ऊर्जेसाठी योगा उत्तम

योग हा मनःशुद्धीसाठीही अतिशय उत्तम औषध आहे

लोकवार्ता । प्रतिनिधी

सध्याचे तणावपूर्ण वातावरण पाहता आपण सर्वांनी मानसिक आणि शारीरिकदृष्ट्या तंदुरुस्त राहणे खूपच गरजेचे आहे. यावर एकमेव उपाय म्हणजे योग. योग हा अनेक आजारांवरील रामबाण उपाय असून मनःशुद्धीसाठीही अतिशय उत्तम औषध आहे. आज २१ जून रोजी जागतिक योग दिवस आहे. लहानांपासून ज्येष्ठांपर्यंत सर्वांनाच फायदेशीर ठरणाऱ्या या योगचे महत्त्व आपल्यापैकी अनेकांना माहीत आहे. या महामारीच्या काळात अनेक जण योगाभ्यास करून मानसिकदृष्ट्या स्वस्थ राहण्याचा प्रयत्न करत आहेत. याला आपले सेलिब्रिटीही अपवाद नाहीत.

मराठी आणि हिंदी सिनेसृष्टीत आपली एक वेगळी ओळख निर्माण करणारी अभिनेत्री अमृता खानविलकरनेही सोशल मीडियावर योग करतानाचे फोटोज शेअर करत, आजच्या काळात योग किती महत्वपूर्ण आहे, हे पटवून देत आपल्या चाहत्यांना योग करण्यासाठी प्रेरित केले आहे.

https://www.instagram.com/tv/CP8VXiJnJ6A/?utm_source=ig_web_button_share_sheet

आपल्या या योगाभ्यासाबद्दल अमृता खानविलकर म्हणते, ”सध्या आजूबाजूचे वातावरण खूपच भयंकर आहे. त्यामुळे अनेकदा नैराश्यही येते. इतकी वर्षं या क्षेत्रात असल्याने शूटिंगच्या, मीटिंग्सच्या, कार्यक्रमांच्या निमित्ताने अनेकांशी भेटीगाठी होत होत्या. मित्रमैत्रिणींना भेटणं होतं असे आणि अचानक माणसांचं भेटणं बंद झाल्याने, त्याचा परिणाम झाला आहे. कलाकार म्हणून प्रेक्षकांसमोर वावरत असतानाच पडद्यामागे आम्हीही एक सर्वसामान्य व्यक्ती म्हणून आयुष्य जगत असतो आणि त्यावेळी आम्हालाही कुठेतरी नैराश्य, तणाव येतोच. यातून बाहेर पडण्याचा एकमेव उपाय म्हणजे योग. मानसिक, शारीरिक स्वास्थ्यासाठी मी सध्या योगला प्राधान्य देत आहे आणि याचा मला खूपच फायदा होत आहे. त्यामुळेच मी तुम्हालाही हेच सांगेन, की दिवसातला काही वेळ तुम्हीही योगसाठी द्या. या तणावपूर्ण वातावरणात एक सकारात्मक ऊर्जा देणारा हा उपाय आहे.”